كتير قوى اليومين دول بقينا نسمع كلمه مصر بخير!!!
قعدت افكر كده مع نفسى ياترى ليه مصر بخير ؟؟
.لما نلاقى اولادنا ضايعين من غير شغل . وتلاقى الشاب من دول طول بعرض ومفيش فى جيبه خمسه جنيه. وهايجيب الخمسه جنيه منين اذا كان مفيش شغل اصلا وان لقى شغل مرتبه 500 جنيه .يعملوا ايه دول
.ولا لما تروح اى مصلحه حكوميه تعمل اى حاجه تلاقى الموظف بكل بجاحه يمدلك ايده ويقولك ادفع قبل ما اخلصلك ورقك .ولما تيجى تقوله دى رشوه ياعم الحج يقول لالالالالالا دى تمشيه مصالح
.وتروح تقف قدام اى مخبز عيش تلاقى الناس بتموت فى بعض..والحكومه ربنا يخليها لينا كل يوم تبعت اطنان لفسطين تحت بند معونات(مع اننا عمر ما هنعجب البهوات الفلسطنيين اللى طول اليوم يشتموا فينا)طيب ياعم الريس ما بلدك محتاجه معونات اكتر من اى بلد تانى .على الاقل البلاد التانيه فيها منظمات كتير وفيه دول تانى مستواها المادى كويس بتبعتلهم بالاطنان
.مصر بخير ازاى وفيه موضه طالعه اليومين دول اسمها اخطف واجرى. كل يوم نسمع ونقرا عن رجل اعمال سحب قروض بالملايين وهرب بره البلد . طيب فين الضمانات اللى سحب على اساسها القرض؟؟ ولا حد هيرد عليك ولا هيعبرك!!!
.معرفش ازاى مصر بخير لما نلاقى بلطجيه الاسلام كل يوم يهجموا على كنيسه او دير ويضربوا ويدبحوا فى الناس. وفى الاخر نلاقى سياده المحافظ يقولك ده خلاف عادى والرهبان كانوا بيضربوا نار ومعاهم اسلحه . وهتتحل بمجلس عرفى ان شاء الله
.مصر بخير والريس قرب يكمل تلاتين سنه ماسك البلد لدرجه انه خلاص مش قادر يمشى على رجليه وماسك فى كرسى الرئاسه بايديه واسنانه والمصيبه انه عايز يورث البلد لابنه جمال باشا !!!!!!
.اكمل ولا كفايه كده ؟؟؟
كفايه عليكم النهارده كده واعتقد ان الكام سطر دول كفايه جدا على الرد على السؤال اللى هو
ياترى لسه مصر بخير ؟؟؟؟
صدقنى معاك حق فى كل كلمه بس مين يسمع ويحس
ردحذف